Mouchacq 29

29. 1er janvier 1654. Quittance pour Jean LABEGUERIE dit de Blanc contre Jean TUGERES dit Bareyre

Le premier janvier mil six cens / cinquante quatre en la parroisse de Sainct-Estienne / maison du Prat avant midy pardevant moy / notaire royal soubzsigné présens les tesmoings / bas nommés a esté présent en sa personne / Jean de TUGERS dict Bareyre habitant de ladicte / parroisse, lequel de sa franche et agréable / voulonté a cogneu et confessé avoir esté / payé avant ses présens de Jean de LABEGUERIE / dict de Blanc aussy laboureur habitant de la / dicte parroisse à ce présent et acceptant / de la somme de huictante une livre que ledict / BEGUERIE luy debvoit pour raison de la tierce / partie de la maison de Bahus, et ce par moyen de pareille somme que ledict BEGUERIE / a dict et déclairé avoir payé à la descharge / dudict Bareyre à Maistre Jean de LAUR procureur / au siège présidial d'Ax pour et à la / descharge dudict Bareyre, et au moyen / de ladicte déclaration et que ledict LABEGUERIE aye / faict ledict payement audict de LAUR, icelluy de / Bareyre s'en tient pour content et en a acquitté / et acquitte par sesdictz présens audict LABEGUERIE / et a promis de ne luy rien demander à l'advenir pour / raison de ce, ains luy tenir la présente quittance / bonne et valable à peyne de tous despens / domaiges, interestz, soubz obligation et hipotecque / de ses biens qu'il a soubzmis à toutes rigueurs / de justice à quy la cognoissance en appartiendra / et ainsy l'a promis et juré à Dieu tenir. Faict / ez présences de Jean de SIULANNE et Jacques de / LANNES laboureurs habitans de ladicte parroisse / tesmoings à ce requis, lesquelz ny lesdictes parties / ne se sont signé signés (sic) à la cedde des / présens pour ne scavoir de ce faire / requis par moy,

BEAULIEU notaire royal

Retour liste